* 口頭禪

口頭禪

口頭禪是常掛在口邊的助語詞，
沒有什麼實際意思。
對著不同的人會用不同的口頭禪，
以下是我近年來常用的口頭禪。


「爸打」
即「Brother」的譯音意思。
四海之內皆兄弟，
我統稱身邊的男士做「爸打」。
例如：同事給我幫忙後，
就會說：「唔該爸打！」
同事唔覺意踩我鞋踭時，
我就會說：「睇路啊爸打！」
我亦會稱身邊的女士做Sister。
雖然她們不是修女。


「參選代表」
通常用於跟朋友們吃晚飯時候使用，
朋友之間每人點一道菜共吃時，
我會說：「我嘅參選代表係羅漢齋。」
朋友們商量放假一齊去邊度玩？
每人都需要提出建議時，
我會說：「我嘅參選代表係澳門。」
表示我的選擇是什麼。


「成件事」
英文即是：「as a whole」，
等於著眼事情整體性的意思。
例如，對方建議我一個方法，
就會問：「我咁做幫唔幫到成件事先？」
原本很美味的晚餐來了一個難吃的甜品，
就會說：「嗰甜品壞咗成件事！」
推卸責任時就會說：「喺成件事入面，我嘅角色一啲都唔清楚！」


「投乜一票」
表示在多項選擇中挑選那一項的意思。
例如，對方問穿紅色、藍色、還是黃色較好時，
就會答：「我投黃色一票！」
朋友商量看那一齣電影時，
就會答：「我投『變型金鋼』一票！」
實行「一人一票」普選制度。


「輕輕」
表示「係咁咦」、輕量、表面化的意思。
例如，對方邀請我吃飯而我又不餓，
我就會答：「好！不過我食輕輕。」
同事問完成某項工作未？
就會答：「未搞掂，輕輕做咗啲咋！」
同事問A高啲定B高啲？
就會答：「A高過B輕輕！」


「有計」
即有腦、富創意、有計謀的意思。
通常和「果然」一起使用。
例如，同事發明一些方法把工作化繁為簡時，
我就會讚：「果然有計！」
朋友把衛生巾作鞋墊吸汗用，
我會讚嘆：「咁都得？果然有計！」


「零」
這裡的「零」跟同性戀無關係，
「零」表示絕對沒有、否定、毫無半點的意思。
例如，別人問我認識C.K. Wong嗎？
我回答：「零認識！」
別人問為什麼錯過某套話劇？
回答：「零吸引！」
別人問我著手開始某工作未？
回答：「零進行！」


「噸」
表示有極多、大量、充裕的意思。
例如，同事問仲有幾多傳單未寄出時？
就會答：「仲有成噸未寄！」
邀請朋友回家吃飯時，
會說：「今晚煮咗一噸飯，大家盡情食！」


「ed」（音：突）
表示動作已經完成、事情、
或動作已完全過去的意思。
「ed」通常加在動詞之後。
例如，朋友問我去過Mega Box未？
就會答：「去ed！」
朋友問Ann和Ben是否已經分手？
會答：「已經分ed！」


「廢Hea」
表示毫無價值、無聊、頹廢的意思。
例如，開了一個無建設性的會議，
就會說：「開咗個廢Hea會！」
看了一齣垃圾電影，
就會說：「睇咗套廢Hea戲！」
見到消極不上進的人，
就會說：「正一廢 Hea仔！」


其餘的口頭禪包括：
「極品！」、「有幾灰？」、
「濕碎啦！」、「簡單任務啫！」、
「激死！」、「真得定假得？」、
「人終歸總要死一次！」。